Në Kosovë janë siguruar 165 mijë doza të vaksinës kundër gripit sezonal. Por, ekziston shqetësimi tek qendrat e mjekësisë familjare se nuk do të furnizohen me kohë. Kjo pasi nga Ministria e Shëndetësisë dhe Instuti Kombëtar i Shëndetësisë i janë kërkuar lista të personave që duhet të marrin vaksinën. Përveç kësaj ngarkese shtesë për personelin mjekësor, mjekët thonë se mund të ngritin edhe frustrimin e qytetarëve që pa dashje mund të mbeten jashtë këtyre listave.

Disa të moshuar të intervistuar nga arbresh.info thonë se ende nuk janë vanksinuar, dhe janë interesuar për këtë çështje në qendrat e mjekësisë familjare.

Aplikimi i vaksinës kundër gripit sezonal pritet të bëhet në fillim të muajit tetor, kur edhe fillon sezoni i gripave. Por, ky numër pritet të shumëfishohet pasi që do blihen edhe mbi 300 000 vaksina. Kështu thotë për arbresh.info, Drejtori i departamentit për informim në Ministrinë e Shëndetësisë, Faik Hoti.

“Por, për dallim prej vitit të kaluar sivjet vaksinat do t’i kemi në tetor edhe sasitë janë pesëfishuar”, shprehet ai.

Ndërsa, Sami Uka, kryeshef i Qendrës Kryesore të Mjekësisë Familjare në Prishtinë, për arbresh.info thotë se i është kërkuar lista e personave me sëmundje kronike dhe mbi 65 vjeç që duhet vaksinuar me prioritet si parakusht për të na siguruar vaksinat.

“Jemi shumë të vetëdijshëm që improvizimi i këtyre listave pos që do të prodhojë frustrim dhe mbingarkese tek personeli shëndetësorë do të prodhoje edhe shume pakënaqësi tek qytetaret që pa dashje mund të harrohen në këto lista”, vlerëson Uka.

Zakonisht në Komunën e Prishtinës janë vaksinuar 10 deri në 11 mijë veta me këtë vaksinë çdo vit. Në mungesë të Sistemit Informativ Shëndetësor krijimi i listave po shihet si barrë për personelin shëndetësor.

Sipas Institutit Kombëtar të Shëndetësisë Publike të Kosovës, gjatë vitit 2019 kanë qenë 16,000 raste të regjistruara me grip sezonal./E.Haxhiu/arbresh.info/